搜尋此網誌

2018年3月17日星期六

我係貓義工我大晒!

我係義工我大晒!
呢件事四年前發生。👇👇👇
今日有位義工 A 拎隻精靈黑貓 b 黎話要安樂死,因為隻貓 b 抽過一次筋,佢哋上次喺同一位置執過一竇 b 全部都係因為抽筋所以打針死晒,驚呢隻貓 b 係同一個阿媽生會有同一個病。
醫生見黑貓 b 仲好精靈,又肯食嘢,就問義工 A 願唔願意比隻貓我哋試下醫,真係醫唔到先 PTS, 義工 A 當然係非常高興,留底隻 b 比我哋。
正當醫生開緊藥嘅時候,義工 A 返黎診所話有個義工 B 堅持要啪貓。我哋百思不得其解,就同義工 B 電話度解釋抽筋好多原因,可以試下用藥醫先,唔得先 P, 義工 B 死都唔肯,我哋當然又用我哋三寸不爛之舌嘗試說服佢,最終佢肯,但話只比三日時間我哋。
義工 A 後來同我哋講,話義工 B 唔想我哋醫黑 b 因為佢覺得我哋係利用雙 b 試藥,當隻 b 係白老鼠,大佬,醫生一分錢都無收佢架,係見貓 b 仲精靈,想盡人事比個生存機會佢!點解要諗得我哋咁黑暗呢?同埋義工唔係要盡力拯救生命咩?抽一次筋就以自己經驗判佢死刑?連醫生想醫都唔比?
後來義工 B 黎探黑貓 b,一句唔該都無,淨係彈我哋無比嘢食無比水,我剛剛先餵完貓 b 飲奶,做咩要放嘢食水比佢呀?方便佢抽筋浸死自己呀?又話無砂盆又咁又咁,唔該唔好忘記你本來係想整死隻貓 b 架!義工,我呸!
至於隻貓 b,留喺診所幾日,經過專人 (即係我 😛) Close Monitoring 之後,發現佢只係因為血糖過低所以抽筋,每餐餵返飽飽就不藥而癒了。
Karen Chiu
2018年3月16日

沒有留言: