Hong Kong could be facing a huge humanitarian disaster due to the expired tear gas abused by the Hong Kong Police
Aug 1, 2019
（求廣傳。求廣傳。求廣傳。）
過期催淚彈呢件事可能比大家想像得要遠遠更加恐怖。香港人吸緊嘅，可能係山埃毒氣。
牛奶本身有益，但飲一盒過期牛奶，尚且會肚痾兩日。催淚彈本身已經係極具刺激性嘅化學品，仲要再過期，可以毒到點？
係無人知。
（題外話：催淚彈係國際戰爭禁用嘅化武，我唔明點解香港都可以日日放向civilian）
作為一個醫科生，又識唔少朋友行得比較前抗爭，係728後呢幾日，我經唔同渠道聽到唔少朋友講有各式各樣嘅疑似催淚彈後遺症：確診嘅化學性肺炎（chemical pneumonitis）、頭痛、不停咳、失聲、心口/肺部痛、反覆肚瀉（呢個好多人有）、大量紅疹、化學𤆥傷，等等⋯⋯個人感覺，情況係比612同928都多都嚴重。
而最大問題係：佢地冇辦法走出黎指證呢個政府、呢班黑警。而家連人道救援嘅護士、路過嘅人，都一律被律政司控以可判十年嘅暴動罪，令到冇人咁講自己曾經係728到過現場，遑論挺身指證。甚至經過醫管局、私院「篤灰」事件，好多人怕到連睇醫生都唔敢。如是者：以後可能會有幾百幾千人受呢啲化武毒害而冇人知，但匿埋係屋企或者某個病房默默受罪。
我唔知道我聽返黎呢啲症狀中，有幾多係真係因過期催淚彈而起。我試過搵文獻去研究，但當然搵唔到：向活生生嘅人類施放化學武器、仲要過期嘅，如斯泯滅人性嘅行徑，邊有人會可以做實驗研究。但呢個正正係係香港發生緊嘅事。
搵返世界新聞，只有委內瑞拉、印度喀什米爾等極少數地區施放過過期催淚彈。委內瑞拉化學家Mónica Krauter曾指催淚氣體過期後會化成山埃（cyanide）、碳酰氯（phosgene）等極危險氣體。而喀什米爾醫生聯會亦曾指出TG本身已經可以致盲、流產、哮喘病發、癲癇、甚至死亡，而過期TG危害更加係無法估計。
我係度有幾個呼籲：
一）去過現場嘅朋友，身體唔舒服唔好嘅，千祈要睇醫生。有需要請搵杏林覺醒 Médecins Inspirés （電話：46100186）。
二）有事嘅或者知道身邊人有相關情況，又信得過我嘅，請聯絡我，我同可靠嘅醫生統計緊相關情況，考慮下一步行動追究黑警。我保證身份絕對保密。
三）記者朋友們，如果可以嘅幫手諗下會唔會可以investigate into this matter。
四）記者又好，咩人都好，以後去到現場，多啲留意附近彈殻，睇下有幾多係過期或者冇標示過期時間。
五）醫生同醫護組織：多留意有冇類似病例。
六）去現場嘅，戴豬咀，戴豬咀。
我地同香港警察呢個極邪惡嘅組織搏鬥緊，可能係面對緊世界上少有嘅危險嘅人道災難。委內瑞拉、喀什米爾嘅消息唔多，但呢度係香港，我地有能力做得更好，保護自己同身邊人，唔比人道災難係香港發生。
https://m.facebook.com/story.php?story_fbid=2288474354592857&id=100002909458272
沒有留言:
發佈留言