香港是美國差佬會死得人多這個結論早已知,現在是用數據和事實來證明給你看。
=====
【美國警察一早開咗槍？】
網上早前有段片流出，撐警陳百祥去狗屋探班嘅時候話：「如果我做警務處長就好喇，兩個月前已經開咗真槍喇！」完全睇到荷蘭叻對開槍掃射示威者嘅嚮往。事實上，呢次唔係荷蘭叻第一次撐警開槍，早喺9月接受訪問嘅時候就已經話，「喺美國發生咁嘅情況，一早已經開咗20幾次槍。」事實上，呢個講法唔係得佢一個講，好多同佢一樣腦殘嘅藍絲都好鍾意講同一番說話。不過，到底咁講又有冇事實根據呢？未忘人決定做個fact check。
首先，美國的確係發達國家之中，警察射殺市民最多嘅國家，根據《華盛頓郵報》資料顯示，2018年同2017年分別有996同987人死於警察槍下，即係每日平均有超過3個人被警察槍殺。不過，美國喺暴力罪案方面亦多過香港好多，以暴力罪案率嚟計，香港每10萬市民只有53宗暴力罪案（2019上半年），但美國就有成369宗（2018），足足係香港7倍。與此同時，美國人因為受憲法第二修正案保障而可以管有槍械，所以國內槍械數目甚至重多過美國人口，人均有成1.25枝槍（2018）。上述兩點都係構成高機率使用致命武力嘅部分原因，而警暴當然亦都係可能嘅原因之一。
不過以上數據只係處理一般罪案（或懷疑罪案）嘅情況，面對同香港相類嘅社會動蕩，美國警察係咪又一如荷蘭叻咁講，一早已經開咗槍呢？未忘人翻查美國過去10年比較大規模嘅社會動蕩，睇睇呢個講法係咪成立。2009至2019年間，美國發生過無數次大小示威、遊行，但衝突比較激烈、規模比較大嘅有35宗，其中被稱為暴動或者騷動就有14宗。喺咁多次大型動蕩裏面，美國警方總共有兩次開槍嘅紀錄，造成一死一傷。
必須指出，有示威者被槍殺嘅嗰次示威活動並唔係普通集會遊行，而係武裝佔領。所謂「武裝」，講緊嘅當然唔係PVC膠管呢類得黑警先會話致命危險嘅武器，而係實彈槍械。當時有最少20個持械武裝民兵參與呢次「馬盧爾國家野生動物保護區佔領」（Occupation of the Malheur National Wildlife Refuge），而死者LaVoy Finicum因為拒捕，揸車強闖路障，而且被指意圖拔槍先至被擊殺。至於另一次警察開槍事件發生於第三波「佛格遜暴動」（Ferguson Unrest/ Riots），有入店舖搶劫嘅示威者駁火，其中一個青年Tyrone Harris就射中一架臥底警車，於是警員還擊槍傷佢。
由呢10年間嘅群眾活動（當中不乏佔領華爾街呢類大型群眾活動）可以睇到，美國警方喺處理呢Ｄ情況下使用實彈並唔常見，基本上只係喺對方都持有槍械嘅情況先會用到實彈，而且並唔係每次對方開槍都馬上用實彈還擊。所以可以講，佢哋喺處理群眾活動上，相比對住手無寸鐵嘅示威者都用實彈嘅港產黑警，絕對係比較克制。不過美國作為一個民主國家，對於市民嘅示威活動自然係比較寬容，而香港早已經淪為警察國家（police state），市民意見WFC。
另外，未忘人亦統計埋呢35次動蕩裏面示威者嘅抗爭手段。香港人四個月前重有潔癖嘅掟磚埸面喺其中27次抗爭都出現過，基本上係美國示威日常；而縱火同「裝修」就各佔16次，喺美國示威文化都可以話相當普遍。（所以日日譴責嘅謝Sir同江Sir真係唔多適合移民美國，好彩有手足幫佢哋留喺大灣區咋）不過講到最富美國特色嘅始終都係陀槍抗爭，足足有7次動亂係有示威者帶住槍械，其中嘅5次重開埋火添。比起嚟，香港示威者嘅所謂武力，根本係小巫見大巫。真正克制嘅唔係黑警，而係香港嘅抗爭者囉。
所以，下次如果再聽到腦殘藍絲老調重彈，話喺美國發生咁嘅情況，警察一定一早已經開咗槍，大家不妨糾正佢，比較符合事實嘅講法應該係「如果喺美國發生咁嘅情況，示威者一定一早已經開咗槍」。
認同請分享，好人一生平安🤗🌼
註：喺個表裏面，紅色嘅係被美國方面稱為暴動嘅事件，而紫色就係武裝佔領。
#FactCheck
#人一藍
#腦就殘
#Holand7
沒有留言:
發佈留言