【關於721】 將會獲得留澳資格 維多利亞州香港學生 可放膽説的話

【關於721】
將會獲得留澳資格
維多利亞州香港學生
可放膽説的話

【關於721】維州香港學生的話

我們邀請了我們的成員，每人寫幾句自己對721的感受和得著再把它們結集而成。可能有點長，但懇請大家用心把我們的心聲讀一讀。我們是一群遠在海外，卻還未放棄的香港兒女。

要數最似夢境嘅一日，一定係721。721係成個抗爭運動中一個唔會忘記到既轉捩點。

嗰日，遊行依舊好多好多人，有大部分人都著黑色衫，大家開始熟悉抗爭呢個概念。夜晚行到中環，經過一班唱詩歌嘅中年人之後，友人大嗌一句：光復香港，我哋緊接住嗌時代革命，一開始只有幾個人和應，但當我哋沿住干諾道中越往上環方向行，「光復香港」「時代革命」此起彼落嘅喊聲就越大。

問身邊嘅朋友係乜嘢令佢地由關注到參與場運動，佢地嘅答案都係「因為見到721事件」。老老實實，我一直都唔想睇721啲片，實在係太撚黑暗，個晚咩事你知我知黑警知鄉黑知大家都知，真相赤裸裸咁喺大家面前。

當日差啲被人打到仆街。

當日其中一個最親嘅人係元朗被攻擊。

嗰晚係好多人第一次上裝備、食催淚煙放題、見到火。再得知元朗嘅事。

當時第一時間諗起既係住附近既所有朋友、親人，一個一個咁打去問平唔平安。

當佢負傷番到屋企仲可以比家中藍絲鬧：「唔好怪警察唔嚟，你唔出街咪乜事都冇。」覺得好心寒，一個我一向覺得幾乎係全世界最安全嘅地方居然可以發生啲咁離譜嘅事，同埋身為家人都可以為咗撐政府撐警察埋沒自己良心。

見住白衣人無差別地向所有人攻擊，覺得好疑惑。好似我見到既，唔係我所熟悉既香港人，亦都唔係我熟悉既香港。

遇襲者恐懼既表情，我到今日都會不時想起。加害者同旁觀者係以咩心態同理據去合理化自己既行為？我愛香港，但係當佢地都係香港既一部份。我點樣可以同樣去理解依班人？

呢日可以話係831之外香港最撚恐怖嘅一晚。

呢一刻，個西瓜閪仲可以開開心心賣西瓜，諗起成班狗睇住CCTV笑曬口唔行出嚟個樣就覺得好嘔心，我地冇嘢可以做到，隨住國安法嘅落實，抗爭空間不斷咁壓縮，究竟我哋係咪真係冇嘢可以做到？成班白衣暴徒仍然開開心心過日子，而警察繼續虐待市民，殺害市民。證據確鑿，大家心知肚明，就係唔承認警黑一家。

一年喇，送中惡法停咗，但係更惡更無賴嘅國安法已經降臨，白色恐佈瀰漫整個香港。加上武漢肺炎，大家招架不住。警黑勾結既實據，香港人既無助，實在令人心痛至極。由呢日開始，香港人連普通返學，返工放工都要提心吊膽。香港變得咁腐敗，令好多人覺醒無人再可以置身事外，無人再可以保護無辜市民。

但係呢啲都唔係放棄嘅理由。

香港人只能靠自己。

我地係唔會驚，香港人係嚇大㗎。

今場運動之前好多人覺得政治凌駕於一般人嘅生活，政治嘅世界係一個「唔輪到我參與」嘅世界。但係喺元朗恐怖襲擊嘅當晚，人民被憤怒動員，似乎都發現咗其實所謂政治並唔係遙不可及。

作為真香港人我哋要更加大力咁去抗爭，冇嘢可以嚇窒我哋，你問咁可以做啲咩，係黃店外賣，唔搭黨鐵，捐錢，幫我哋立會候選人做義工，仲有好多好多，一直都可以做去幫香港，係睇你做唔做家啫，係咪？香港人，用盡一切方法去抵抗暴政，命運自決。不論議會戰線，國際戰線，街頭抗爭，目標都係一致，就係抵抗呢一切一切。

唔好妄自菲薄，每個人都可以做到好多。在外嘅港人，大家都唔係一無是處，運用自己身處外地同人脈嘅優勢，打好國際條線。

望見身邊咁多嘅不公義，制度嘅失衡，當權者道德嘅淪喪，我哋唔需要再諗自己係咪適合或者係咪啱嘅人選。如果你係睇到721呢啲事件而深深不忿的話，請用盡任何嘅途徑憑自己嘅力量去推動改變， 唯一嘅門檻就係你對公義嘅執着，我哋距離變革就係差嗰一點義憤。

嗰晚，上環有好多張，因為終於喺街頭聽到「光復香港 時代革命」口號而欣喜嘅面孔。唔知嗰晚呢幾十萬人依家點呢？平安嗎？喺香港嗎？係咪仲堅持緊？希望係啦。望住嗰堆燒緊嘅雜物，我當時好平靜咁諗，呢一切只會係開始。我哋香港兒女嗰團火，先啱啱開始燒咋。

爭取民主自由從來非一朝一夕，一息尚存，抗爭到底。香港人，Stay Safe, Stay Strong ! 下半年繼續撐住！

(Photo credit: LIHKG, TLHK)

https://m.facebook.com/story.php?story_fbid=297859038231326&id=105332320817333