一家三口未打針，分享一下今次中omicron嘅經歷

 一家三口未打針，分享一下今次中omicron嘅經歷

話說4m BB 2月9日食完口服輪狀疫苗，醫生有比到退燒藥水；2月10日，老公去咗做身體檢查同埋打咗HPV針加乙肝針，副作用有機會會發少少燒，所以到11/2佢發燒同BB發燒我都以為正常。有幫老公搽精油，亦都有比BB多啲埋身飲奶。我哋都仲未戴口罩，繼續同一間房瞓。

到2月12號，連我都發燒，我都諗緊係佢哋有感冒惹到我？定係我哋中咗omicron ? 嗰日朝早開始，全家帶口罩。當日出咗去睇醫生，醫生嗰度冇快測，佢話唔準😂佢睇我哋嘅症狀佢都話有機會係感冒，亦都有機會係omicron, 所以照樣開咗啲咳藥水、喉糖、退燒藥、退高燒藥俾我哋。同事俾咗樽仔我哋兩個大人留口水樣本。我哋係咁瞓覺後，係咁飲水，係咁啪維他命C，比身體好好打仗（我信天父創造的免疫系統😛）

13號老公出去交完口水樣本之後，我哋就冇再出去。因為我哋覺得自己應該係中咗招。同一日，老公已經變咗低燒， BB都冇再發燒。我哋亦都開始分房瞓，爸爸瞓沙發， BB同我一齊瞓。因為太攰嘅關係，所以BB夜晚都係埋身飲奶。我好想補充：人奶真係會pass到抗體比BB ！之前我嘅奶應該係黃白色，但係病咗嗰幾日啲奶有少少綠色！網上見過，中咗招嘅媽媽嘅人奶都會少少綠色，所以我更加毫不猶豫地比BB繼續飲人奶，因為有最天然嘅抗體。

14號，佢哋兩個都退晒燒，剩低我仲發緊燒，我諗因為我遲過佢哋發病，所以都遲過佢哋退燒。同日，我哋收到朋友的快速測試，老公兩條線，我同工人姐姐都一條線。老公同BB都冇痰又冇咳，我最多痰，係咁想咳啲痰出嚟，有幾次係廁所咳痰，老公話我咳到好似暴龍咁樣😂🦖結果咳到喉嚨損咗，唔係好講到嘢。BB應該好唔慣平日會歡呼尖叫係咁講野唱歌同佢玩嘅阿媽突然靜咗😂夜晚我再做多一次快速測試，都繼續係一條線。

15號，我繼續抖左全日，老公同BB都差不多回復正常，不過繼續戴緊口罩！無上網課(本人係老師，本身有醫生紙挨到30/4，而家可以extend多180日😂）係咁瞓。另外我都有係咁搽精油同埋滴啲精油落去蜜糖度，等個喉嚨舒服啲！

15號至17號，我上返網課，不過最初都係播Listening多，因為仍然講嘢會喉嚨痛同埋少少咳。到17號其實都可以正常上堂了。同埋我做快速測試終於兩條線了，老公都係繼續兩條線， 工人姐姐繼續一條線。

17號凌晨，終於收到衛生署訊息，我哋初步陽性。不過我哋已經好返左七八成🙈😂

「[D0001-DTS：檢測結果（17-02-2022）為初步陽性，請留在家中等候衞生防護中心聯絡] 樣本瓶：xxxxxxxxxxxxx；證件號碼：xxxxxxx [請勿回覆]」

20號星期日，兩公婆都收到衛生防護中心電話，問我哋地址同埋有乜嘢人同住。我哋問佢之後會有乜嘢安排（好驚要入竹篙灣叫天不應叫地不聞），佢話佢都唔知道，會有其他同事打俾我哋。

23號，老公終於收到訊息話確診陽性。不過我收唔到。晏少少老公再收到電話，話會送快速測試同埋手帶俾我哋。一送，送咗8份過嚟😅我哋再做快速測試，已經一條線。不過因為政府訊息混亂，佢哋話有人send訊息起計14天，🤪即係仲要留到係屋企兩個星期。

「閣下早前對2019冠狀病毒檢測結果呈陽性，請參考以下的重要資訊: https://www.chp.gov.hk/tc/r/1363。衞生防護中心將向你及你家人(密切接觸者)送遞資訊及快速抗原檢測包，請按照指示進行檢測，你的家人須留在居所14天(你收到陽性結果通知當日為第1天)進行密切接觸者的家居檢疫，期間監察身體狀況。為方便衞生防護中心進行流行病學調查，請透過以下連結(www.chp.gov.hk/cdpi/)提供個人及家居接觸者的資料。等候送院或隔離設施人士的醫療查詢可致電醫院管理局電話熱線1836 115，家居檢疫人士可致電民政事務署的「居安抗疫計劃」1833 019 熱線尋求協助 。[請勿回覆]」

於是24號就不停打1833019 ，應該打咗過千次（唔係講笑）先至打到，福利處問咗我哋有乜嘢需要，幫我哋mark低咗，然後話佢都唔知幾時送到，只可以同你講唔係今晚亦都唔係聽日。

25號晚，老公又收到電話，話係送物資嚟，送左好多食物同罐頭，仲有奶粉同尿片俾我哋。過咗一陣，老公又再收到電話，話係送快速檢測俾我地，我哋話我哋有啦喎，帶緊手帶啦喎！佢話我都係跟order做嘢，要影相俾返政府！然後我哋又再收到八袋快速檢測加手帶（😂😅三大一小share16條手帶，亂到呢）同日，老公收到訊息（係呀，我keep住冇再收到正苦訊息），話居家檢疫由交完樽仔之後計Day 1！知道呢個消息勁開心，因為就嚟可以放監！

「提提你，如你在核酸檢測陽性後第 14天*進行快速抗原檢測的結果呈陰性，你可外出及如常生活。如你(密切接觸者)同住家人中沒有新的確診或初步確診者，你家人的檢疫期亦會於同日完結。如有疑問，可致電「居安抗疫計劃」1833 019 熱線查詢。[請勿回覆] *以接受檢測或接收樣本翌日為第 1 天；如無接受檢測或接收樣本紀錄，則以收到檢測結果通知當日為 第 1 天」

27號今日係最後一日居家檢疫啦！👏🏻👏🏻👏🏻

講下比大家嘅建議：

-無論家中邊一個開始有少少病徵，就全家開始戴口罩

-快速測試真係唔係咁準確，因為最初可能病毒量低而會一條線，做多幾日安心啲，我高燒果日一條線，退晒燒兩條線

-症狀真係好似重感冒，耳探最高39.3度 打左針嘅無咁高燒掛

-識得另一家人中咗，2大3小（1個係4m BB)打左兩針復必泰，都係類似嘅症狀，沒有重症；所以中咗唔使太擔心，只要冇持續發高燒、呼吸唔暢順，應該可以好快好

-政府嘅熱線電話，不停打不停打不停打，只要有恆心，鐵柱磨成針😂不過如無大礙，都會繼續如無大礙！多休息多飲水，就會好快好！

-政府安排日日變，我嘅經歷只作參考

-如果媽媽有餵人奶，繼續餵人奶，有天然嘅抗體俾BB（我BB真係最快好返）

-記得中咗的話，拎醫生紙，90-180日後先可以打😎

-個人認為，唔好比政府日日特登強調嘅重症死亡個案嚇親，令到人心惶惶！其實人嘅免疫系統好叻，你無長期病患的話，身體會識得幫你打仗！

https://www.facebook.com/groups/becompelled/permalink/497665735104616/