尋找醫學豁免之被奚落之路

Maisie Chan:

 尋找醫學豁免之被奚落之路。。。有點長。。。

話說尋日起身，第一件事就上網搜尋附近嘅診所。逐間打去問，終於有一間了解咗情況之後，問完醫生後打嚟回覆話幫我同小朋友約咗下晝5點去見醫生，但講明唔好抱太大期望一定續到免針，講明開唔開到都一人診金500。

心諗至少醫生都冇一開始就拒絕，約見得至少都有五五波，去到之後，見咗比我遲嚟嘅三個病人先到我，足足等咗45分鐘，心諗可能關係到豁免就等其他病人走咗先見我。入到房，醫生問係咪想問有關問題，我都有講明政府話持有7醫生嘅豁免嘅病人須於仍有效呢幾日自行再搵醫局核下或私家醫生做評估，睇吓可唔可以再續，問完我喺邊度開，就話「嘩！你個醫生開得最多，搵得最多錢果個喎！收成三、四千一張喎！」我回應返「我睇果日係同小朋友喺醫院覆完診，手上揸住大堆藥，醫生仔細評估過先開，而且唔係報導所講3、4000，而係同你一樣收500，而且亦唔係報導所指日日簽幾百張，人哋一日只排一百個籌，新聞所報唔單只對醫生不公，對病人更加不公，要講濫發，醫生發嘅QRcode邊個批？醫生都係要經過批核先交到病人手上，咁責任點解全部歸咎於醫生？最後仲要一刀切，話我哋係假病人、假針紙？」當時佢仲回應「嘩！咁即係新聞報好多假嘢喎！又真係唔公平！」之後揸住張登記卡就第一時間查醫健通，而我亦帶齊我同小朋友所有覆診紙比佢睇，佢亦喺醫健通逐項睇，仲話「你都食緊幾多藥吓，都睇緊好多科」，點知睇完哂，結論話「其實我唔覺得你有病，你只係貧血嘅問題啫！但你最後一次抽血都冇貧血！你所講嘅病我覺得都係你自己覺得！你依家同我講嘢都幾有中氣吖！一啲都唔似有病，你睇咁多科係因為你自己話唔舒服，醫生咪轉介返果科，咪變咗多囉！」我話上次冇貧血係因為醫生開咗大堆補鐵丸，keep住食所以當時再抽血就冇貧富，停藥就低返。至於覆診方面，如果冇問題醫生就唔使要我兩三個月就覆一次診啦！到問小朋友，小朋友自己講完，佢話因為我未做授權所以開唔到小朋友醫健通，全程佢只係翻查醫居嘅指引，之後就比段英文叫我同小朋友睇，逐樣數，話原本我哋嘅病喺最初真係被列入唔適宜打針犯圍，但政府一改再改，已經全部列入可打犯圍。話唔係唔想幫，我都好同情你明白你，以前我都好手鬆，開過好多豁免比人，但依家出哂指引，又拉咗咁多醫生，我都比你睇埋個指引啦！跟住提到話醫生從來冇話我係抑鬱症，只係話我適應障礙症，我解釋比佢聽我翻查過兩樣症係互相衍生，而且有抑鬱症係醫生評估完同我講，先轉介精神科，之後就每三個月要覆診，每次覆診醫生都係話我抑鬱症，唔通我自己作嗎？

隨後呢個醫生問我點解唔去打針，我話身體問題唔敢打，而且由一開始係醫生話我同小朋友唔適宜打，一直到依家都係，但到咗話210要落實通行証後醫生就唔敢開豁免，但就叫我試吓搵私家醫生，係有機會開到，結果半年前醫生評估完就開咗半年。佢聽完開始問其實點解我唔肯去試吓打針？我老實同佢講除咗身體問題外，係我唔相信枝針，佢聽完開始用好差嘅態度對我，問我由第一次食第一粒必理痛，點解夠膽試，我話因為必理痛係研發咗多年，而且經世衛認可，而枝針只係研發咗幾個月，亦未經註冊，我絕對唔會打一枝連成份都唔知係咩嘅針入自己身體。佢聽完好激動，話必理痛我又敢試，枝針連試都唔試就拒絕，叫我去試針，a唔得就b，唔好彩試完敏感，告上法庭賠都賠死。我話嘥氣啦，只要係一個未死嘅人都話打得，如果真係打完出咗事咁點？就算有事，最終都話唔關枝針事，自己有病出事就話啫！自己身體自己話事，自己先最知自己身體狀況，你睇完哂我啲病歷，都話我好多病，食緊好多藥，但最終你竟然話我唔似有病，咩病都冇，我有病我辛苦嘅時候痛苦只有自己知，點解連幫自己身體做主都唔可以？佢回應返我，話點解唔睇大數據，出事嘅只係小數，大把人打咗都冇事，我都打哂啦，我夠冇事啦！唔明你點解要咁堅持。我都回應返大把出事，攪到家庭破碎，近日亦有2、3歲bb打完面癱。佢都怒氣沖沖咁叫我去試，唔試點知得唔得！又話睇醫健通見我由2005年一直堅持，又話自己周身病，又話小朋友病。我話05年小朋友先啱啱出世，當時我哋咩事都冇，我仲係極小睇醫生，有咩可能？小朋友仲要係臨近三歲先發現有遺傳性哮喘，仲係嚴重果隻。之後話我咩都幫小朋友揸哂主意，知唔知我會害死佢？唔比佢打針佢得唔到保護，又邊度都去唔到，仲會影響佢成長，阻礙佢長大後嘅前途，咩工都做唔到，出唔到國，冇哂社交，話我累咗小朋友一世😡叫我唔好擺佈小朋友，咩都幫佢揸哂主意，我話其實小朋友已經大，如果佢堅持嘅嘢我都冇權揸主意，佢自己亦有睇好多資料知道枝針係冇註冊，亦知道自己身體係有問題，所以佢先堅持唔會打。呢個醫生，繼續火氣十足，話我死都堅持唔肯打，要周圍比錢搵醫生，點解唔打？唔係唔同情你唔明白你，但你都唔想我開完比你我連醫生都冇得做仲要比人告呀？我話唔好意思，其實我冇咩錢，唔通入診所評估完開唔到，醫生會唔收錢咩？我一陣喺你度行出門口我咪一樣要埋張單，比完一千蚊先走得！我埋完你張單，我已經再冇錢去搵第二個醫生啦！咁依家你開唔到小朋友醫健通，即係唔會睇佢架啦！佢話係呀，淨係收你果500蚊！

自己嘅病歷：睇緊內科外科、骨科、精神科、婦科、腸胃科、心臟科

有子宮肌腺瘤、貧血、凝血、藥物敏感、皮膚敏感、胃出血、十二指腸潰瘍、心律不正、花粉敏感、小量食物敏感、骨骼受損引致退化、疫牢久坐導致骨骼問題排緊義肢矯形做腳套、未肯定係類風濕性關節炎定紅班狼蒼症引致嘅長期骨痛、偶發嘅淋巴腫漲、腸易激導致嘅長期腹瀉、抑鬱症、適應障礙症

小朋友嘅病歷：嚴重且不穩嘅哮喘、先天嚴重鼻敏感、耳石暈眩症、偶發腎酵素過高、地中海貧血指數擲界、脊椎側彎、濕疹

#唔知點解呢位醫生話我好健康唔似有病

#講得之前鬆手開好多豁免仲使咩扮逐樣指引睇

#點解又唔話佢濫發