在英日常
分享下搵工既心路歷程。
個個都話搵工好難，搵返本行更難
我就有少少覺得係5毛吹出黎。
首先因為網上個個都咁講，搞到我心驚驚唔敢搵，放左自己半年幾假係當地讀英文，然後就開始慢慢搵。
🔶️第一份係泰國餐廳做兼職bartender，從來無做過呢行既我都幾開心間野請0經驗+英文B1既我😆
見工過程純粹用電話就請左我
不過做左幾星期手痛就無做了，但午晚餐真係好爽，貼士大家分，所以都做得幾開心，泰國菜勁好食。
人工：£8.9 ph
🔶️第二份工係喺學生宿舍做兼職夜晚receptionist。完全無咩野做，可以帶電腦做自己野，超級Hea工，有時有香港學生同佢地傾計幾開心。份工發展到返埋日頭，後來請左人就少左搵我返了。
見工過程又係純粹用電話就請左我。
人工：£11 ph
🔶️第三份工係喺Audi做兼職Receptionist，呢份就比較多係咁講英文，一開始好唔習慣，不過好多靚仔靚女，啲人又好nice好好，到佢地想我轉全職我就無做了，因為我有其他野想做就免得浪費佢地時間了。
見工過程又係純粹用電話就請左我。
人工：£9.5 ph
🔶️第四份基本上都係做兼職Receptionist，不1過就更加無野做🤣日日返去只係聽電話同開門比人入，呢份做得最爽，不過佢請到人就無得繼續做喇！佢地偶爾要人我都會繼續返btw。
見工過程：網上填一大堆問答，之後打比我send CV，傾左陣電話就叫我第二日返工。
人工：£10 ph
🔶️第五份係全職Graphic designer，終於做返老本行😆最正既係呢份工係Work from home，每月返一次office咁大把，所以係十分之舒服。公司提供哂所有要既野，所以無咩問題。
見工過程：Team面試，同最大粒&Team head通過電話面試，原本安排左第二次面試，但HR通知我話佢地十分滿意我既表現，覺得我能力同性格都好岩呢份工所以唔洗第二次面試就直接請左我。我而家都係做緊呢份工btw
我仲好記得一開始好多人同我講話好難做得返設計，又話咩英國人淨係在意你有無在英經驗等等，又話只可以做低等既工之類，我真係比呢啲說話拋窒左一段日子，但到我真係開始搵工就發現一啲都唔難，除左請我既呢份Graphic design工我仲收到唔少job offers不過貪呢份夠近唔洗搬屋咁解。
想同大家講，係英國要搵工真係唔難，職場上啲人知我英文唔好都特別照顧我，會講啲好容易既英文同講慢啲去就我，所以真係唔洗怕，同路人共勉之！
我亦都想講返，我會選擇Receptionist同Bartender都係為左練自己同英國人溝通，仲有電話聽力，各式各樣既口音etc....
P.S
我英文B1~B2程度。
IELTS overall 5.5, speaking 6.5
比大家知道下個背景作參考
P.S2
好多人質疑我所講既英文唔好
老實講我黎到英國又點會係對比係香港
我既英文唔好係對比英國人，而非香港
不過對比好多香港人我英文都唔係特別好
我英文真係好平庸架咋，不過自從我決定黎英就開始睇勁多英劇，盡量唔用字幕，The IT crowd我重覆睇左50次都有🤣由唔知講咩去到明白講咩
嗱，我會考英文係肥既，得口語合格，英文黎講我真係純粹後天努力，迫自己睇英美劇唔睇字幕係十分大既幫助，由唔明去到明既階段係好神奇，當然有時都忍唔住查下翻譯啦，不過講既係睇左幾次都唔明先會自己查翻譯，十分之加深印象。希望幫到同樣英文苦手既人。
https://www.facebook.com/100065288392057/posts/376491484537128/
沒有留言:
發佈留言