藍絲瘋傳林兆波「中風」 為禮賓府「勇武」代言人開脫？

波叔中風都要出騷，做林奠親人好惨

【李八方online】藍絲瘋傳林兆波「中風」 為禮賓府「勇武」代言人開脫？

1小時前

即時要聞

原來要講勇武，個個人都唔及特首林鄭月娥嘅老公林兆波，早前林兆波陪同林鄭喺澳門出席文藝晚會時，懶理中共國家主席習近平同場表現得好high，喺現場播出《歌唱祖國》時唔跟大隊打拍子拍手，一直人以射罰球姿勢咁呆企喺度，唔少網民已封「花式玩命」林兆波為手足，讚佢同777割席。點知藍絲似乎唔like林兆波成為「勇武」代言人，日前瘋傳佢因為「中風」而拍唔到手，叫大家唔好誤會佢喎。

嘩！第一先生中風係大新聞，八方當然四出求證。有政界話冇聽聞林兆波身體有事，當然唔知係咪777唔想講啦？睇番政府早前推出嘅澄清網，至今未有澄清呢段已經傳咗兩三日、藍絲疑似為777解圍嘅傳言。

八方都問過醫生，有人話醫生群組都傳出林兆波早前曾經輕微中風、所以當日冇「跟大隊」唱歌同拍手嘅訊息，但唔知源頭都係咪嚟自同一群藍絲。但呢位醫生心水好清，佢話如果出現輕微中風，病人可能半邊身活動困難，而且難以獨自站立一段時間，睇番當日林兆波可以喺冇人攙扶下，自行步入會場及站立，醫學專業意見認為唔似中風，唔知係咪有人想為林兆波開脫？

有腦科醫生則指，當好多人做同一動作，人嘅心理同腦部會自然跟隨做同一動作；一般而言，即使病人有中風、柏金遜症或認知障礙，都唔會阻礙病人有呢類自然反應。

如果根據醫生專業意見，似乎唔認為林兆波中風喎。八方回帶睇番當日情況，發現根據澳門新聞局片段，習近平出席澳門新一屆政府就職禮離開會場時，特別回頭同林鄭握手，而林兆波當時可以自行行前一步，自然伸出右手同習近平握手幾秒，仲有點頭；跟隨喺習近平之後嘅澳門特首賀一誠同林鄭握手後，都有同林兆波握手，片段所見林兆波無咩異樣。

到底林兆波身體抱恙抑或「被中風」？特首辦回覆八方時，冇證實或否認林兆波係咪一如傳言中風，只係話林兆波博士「健康良好」。

https://hk.news.appledaily.com/local/realtime/article/20191224/60412291