=====
當生活只剩下生存，這城市已死了
徐然
2020/7/27
隨住本港第三波疫情爆發，越演越烈，港府再度收緊抗疫措施，從 7 月 29 日起，將「限聚令」收緊至兩人，室內室外所有公眾場所強制戴口罩，全面禁止所有餐廳堂食，為期七日。
香港，從來只有「生存」，沒有「生活」，喺疫情下表露無遺。香港政府根本無當香港人係「人」，無理會過作為「人」嘅需要，喺林鄭佢眼中，香港人只係一班不停工作，製造 GDP，準時交稅嘅機器；除咗「工作」，就只需要滿足「食瞓拉撒」的基本需求，但係到咗今日，香港人連「衣食住行」嘅基本需求都日漸被剝奪。
二人限聚令代表乜嘢？代表唔同住嘅子女唔可以回家探父母，代表兩個人以外只剩下猜忌與不信任，代表整個社會將會被切割至兩個人為單位的個體（警隊例外）。唔好唔記得，我哋偉大嘅特首係「孤家寡人」，老公同兩個仔都唔喺香港，家住過萬呎嘅禮賓府，長期獨守空房，一個人又如何？佢無朋友、無親人，其他人都唔需要，仲容許「二人相聚」已經係皇恩浩蕩；同樣，佢無生活、無興趣，其他人都唔需要，都係多餘。
關閉運動場、關閉游泳池、關閉泳灘、關閉健身室，對政府嚟講，係一啲非必要嘅設施，只係「娛樂場所」；但係對於好多人，跑步、游水、健身係職業，係謀生技能，更加係生命。喺疫情之下有幾多游水教練、健身教練手停口停？又有幾多全職跑手、運動員連生命中嘅唯一目標都被剝脫？這些，佢哋毫不在乎，眼中只有來往中港商賈要免檢疫，只有董家船運生意有關嘅船員先有人道需要。
林鄭只知道要香港人返工，經濟要轉動，但係佢唔會理會人工作時要解決「食」嘅需求。政府單方面覺得全面禁堂食咪外賣飯盒返公司食，成個 CGO 都係咁，但係佢哋無視呢個社會上係有班藍領階層、清潔姐姐、地盤工人、運輸司機每日工作十幾個鐘，無 office、無得帶飯、無得 work from home，全面禁堂食加埋室內外所有公眾地方必須戴口罩的禁令實施，等同將佢哋連踎喺公園、匿埋喺公廁食飯嘅權利都剝奪埋。
「夜晚無得堂食咪多啲返屋企食飯囉」，家住禮賓府嘅林鄭、擁有官邸嘅張建宗，係唔會體會到有好多家庭住喺一百呎都唔夠嘅劏房入面，屋企煮飯係一件好奢侈嘅事。佢唔會理解到呢個社會係病到有好多人會睇住個電費嚟做人，劏房業主收三四蚊一度電，搞到日日三十八度屋企都唔敢開冷氣，靠日頭坐喺麥當勞、圖書館度日解暑。跟住佢就好天真咁問：點解大家唔留喺屋企「齊心抗疫」？
永遠佢會叫你包容、叫你體諒，相反，政府永遠唔會體諒市民，張建宗叫你去郊野公園開餐，但記得唔好整污糟地方。說到底，早喺特首選舉嘅時候，已經話俾全世界知我哋嘅特首係一個連八達通都唔識用、連廁紙都唔識買嘅「人」。再離地嘅政策，再荒謬嘅法例，都只係「何不食肉靡」之嘆，背後是冷血無情。
全城全市限聚、禁食、戴罩，但繼續返工，人人長命百歲，人人行屍走肉。當「生活」只剩下「生存」，即使沒了肺炎，這個城市經已死了。
https://www.thestandnews.com/society/%E7%95%B6%E7%94%9F%E6%B4%BB%E5%8F%AA%E5%89%A9%E4%B8%8B%E7%94%9F%E5%AD%98-%E9%80%99%E5%9F%8E%E5%B8%82%E5%B7%B2%E6%AD%BB%E4%BA%86/
沒有留言:
發佈留言