如何阻擋武力鎮壓

梁啟智

2019/7/16 

嗱，我分享歷史故事咋。

大家知，我兩年前寫過本書，講前蘇聯加盟共和國的獨立運動。今日又同大家分享其中一個章節。

咁多個案例，最勇武的應該係立陶宛的獨立運動。事源去到一九八零年代末，蘇聯經濟崩潰，再加上爆咗個切爾諾貝爾，偏偏政府只係識得講大話維穩，唔識救災，於是人心渙散。戈爾巴喬夫把心一橫，想通過民主改革重振旗鼓，不過佢太過自信，結果喚起各地獨立運動。一九九零年二月，立陶宛迎來第一次民主選舉，反對派努力協調唔好撞區唔好互相𠝹票，又成功策動立陶宛共產黨內部分裂，大家又肯暫時放低捉鬼心魔，結果大獲全勝，過埋三分之二大多數。當選第二日，就宣佈獨立，打響前蘇聯獨立運動的第一槍。

不過，之後成年，都冇第二個加盟共和國夠膽跟機。點解？槍打出頭鳥，你做第一個，蘇聯即刻打死你先。蘇聯對立陶宛實行經濟封鎖，民心隨即不穩（講開又講，立陶宛宣佈獨立之後，立陶宛警察的效忠問題都相當有趣，有機會再講）。呢個時候，就有班「愛護立陶宛力量」走出來要求蘇聯派軍接管。

一九九一年一月，蘇軍擺好陣，要接管立陶宛。市民就走哂出嚟起路障，又去電視塔手牽手擋坦克。未有 FB/IG 的年代，政變就係攻電視塔，所以大家都走去守電視塔，結果當晚蘇軍殺咗十四個平民。

維爾紐斯電視塔前紀念義士的十字架

去到呢個位，其實成場運動生死只差一線。不過，呢個時候，有三件事發生，令到蘇聯冇繼續攻落去。

第一件事：世界睇得見。雖然首都電視塔被攻，但外面仲有個豆泥電視台仔，佢哋就即刻去 Live 對住個電視講，邊個識得外國語文嘅即刻同我入嚟！一時間，成班大學教授湧去直播室，輪流多國語言要求國際支援（係呀，去波羅的海旅行，你會發現好多嘢好熟口熟面）。微弱嘅訊號咁橋俾瑞典收到，之後就廣發全世界。講明先，當時美國打緊伊拉克（第一次），唔係好想得罪蘇聯，加上蘇聯有核彈，譴責都係就住就住。反而歐洲國家就真係幫到手，冰島仲第一個國家出嚟承認立陶宛獨立（係呀，冰島呀，早排響聯合國頂住中國抗議俾 HOCC 繼續發言嗰個冰島呀）。

第二件事：兄弟拍住上。蘇聯攻立陶宛的時候，同樣有進攻樓上的拉脫維亞同埋愛沙尼亞。波羅的海呢三兄弟，大家都俾蘇聯打壓，獨立運動一齊搞，有難就一齊擋。拉脫維亞首都里加的市民又去起路障守路障（東北歐地頭一月流流落哂雪咁守喎），結果佢哋都死咗四個平民。（不過最慘烈的，就要係蘇聯另一面的阿塞拜疆，同一時間死咗百幾人，之後全民罷工成個月，但係就得不到國際社會注意。）之後呢三兄弟一齊拒絕參加蘇聯的保留公投，自己走去搞獨立公投，當然三個國家都高票通過。

第三件事：火燒佢後欄。立陶宛擋坦克嗰晚，係一月十三號星期日。一星期後，一月二十號星期日，響莫斯科，有數以萬計市民響紅場外面集會，聲援立陶宛。莫斯科喎。紅場喎。點解咁都得？因為當時俄羅斯自己都有民主運動爆發緊，葉利欽仲親自去塔林聲援波羅的海。如果俄羅斯自己本身唔動搖，其實各個加盟共和國搞乜都冇用。後來到八月，蘇聯保守派政變失敗，各加盟共和國趁機會紛紛獨立，西方各國亦終於夠膽落注支持，蘇聯去到年尾正式解體。

嗱，我分享歷史故事咋。世事當然唔會完全一樣地重複，我今日都唔知可以邊度搵個戈爾巴喬夫同葉利欽俾你。不過，世界睇得見、兄弟拍住上、火燒佢後欄，呢三點應該都幾超越時空。畢竟，你得豆潤咁大，任你點升級升級再升級，都大唔過人地聯合國安理會常任理事國，隨時升級變送頭。如何合縱連橫，點都要諗下。

作者 Medium

https://thestandnews.com/politics/%E5%A6%82%E4%BD%95%E9%98%BB%E6%93%8B%E6%AD%A6%E5%8A%9B%E9%8E%AE%E5%A3%93/