不過,如上週五所言,看股滙走勢,我不認為國安法會真的通過;但看報導,我的看法會是9成9錯的😢
據聞呢幾日 VPN 供應商生意好好，例如 NordVPN 就透露，早係星期四當日嘅下載量，就比之前一天增加咗120倍。
但係喺你下載之前，請首先問自己一個問題：你期望 VPN 可以點樣幫到你先？
正常上網，由屋企電腦連線外國網站（例如 Facebook），Facebook 可以知道你係由香港連線過去訪問佢地網站，VPN 就係中間隔左一層，你經過 VPN 駁去 Facebook，Facebook 就唔知你係由你屋企駁過去。
聽完之後，你可能覺得 Facebook 知你由邊度駁過去又點？無錯，Facebook 知道你嘅資訊其實遠比你個 IP 地址多好多，所以我話如果你只係想用 VPN 黎玩 Facebook，咁就真係多此一舉。
乜嘢時候會用上 VPN 呢？第一，如果你仲去中國，而且要訪問一啲畀中國 GFW 封咗嘅網站，如果你個 VPN 冇畀中國封嘅話，咁你可以透個 VPN 去例如 Facebook 等網站。
第二個情況，你要訪問一個網站但你唔想人地知道你由邊度連過去。例如同樣喺中國，2005年嘅師濤案，就係因為 email 服務供應商 Yahoo 向中共提供左佢當時發 email 嘅 IP 地址，從而搵到當事人屋企住邊然後拉人，師濤最後被判十年徒刑。如果當事人有用 VPN，中共當時就未必查到佢係邊個，或至少需要更多時間先查得到出嚟。
用 VPN 你其實係想隱身，而唔係做返平時做嘅野，而且過程中其他方面都要配合。就當係捐錢畀 612 做例子，你可能擔心有一日佢地畀人拉完然後發現你有份捐錢，最隱身方法去捐當然就係用現金放入去捐款箱，除咗當場見到之外基本上唔會留下任何痕跡，但如果你想網上捐錢，VPN 可以幫到你嘅，至少就算 612 畀黑警封查埋電腦都唔會搵到你 IP 地址，但好可能仲會有其他記錄，例如你轉錢個戶口 … 等等，所以 VPN 只係其中一環幫你隱身，但係咪完全有保障呢，仲要睇你用 VPN 當時做乜嘢。
如果真係要做好敏感的行動，VPN 之上你仲有其他野要準備：鬼 a/c、太空卡、甚至另一部電話／電腦。一窩蜂咁裝 VPN 而唔理解背後嘅原理，無疑於藥石亂投。而且小編覺得裝三唔識七公司嘅 VPN，同用共產黨設置嘅 VPN 嘅風險分別唔大。尤其是係免費嘅 VPN，更加要有介心。記住一句至理明言：if you're not paying for the product, you are the product。
最後，借用一位朋友嘅感想作為總結：如果你用開小米家電，用華為手機，裝wechat，最近仲玩埋抖音，咁其實 VPN 真係完全唔關你事 🤷♂️
https://m.facebook.com/story.php?story_fbid=3208295202543524&id=907020282671039
沒有留言:
發佈留言