有幸親歷見證壹傳媒(282)大奇跡日：然後搞到我買兩萬幾蚊股票都要比人抹黑
2020年8月10日
不嬲唔妥壹傳媒，尤其《蘋果》曾經開名搞9過我，有哂牙齒印。
但今朝一起身睇見肥佬黎被捕，突然有種兔死狐悲嘅感覺，無論佢點屈本土派同毓民都好，走唔甩嘅佢隨時面臨以10年計嘅刑期甚至終身監禁──本身佢有十幾億身家，大可以學某「黃標KOL」一早走佬去台灣，又或者要求旗下編輯自我審查，學另一班「黃標KOL」將啲敏感言論下架或者直接Hide埋佢；甚至直頭賣盤比紅底向中共投誠……是但一樣都應該唔駛落得今日下場。
但佢就係響走唔甩之後死撐落去，然後比人又拉又鎖，而《蘋果》作為最後一個死頂共產黨嘅主流媒體，隨時一舖玩撚完。睇住件事發生緊唔知有乜做倒，話撐又唔想學班「黃標KOL」得把口然後繼續叫人課金課金課金；落街買份蘋果又太過微不足道；
然後我覺得最唔抵得嘅係，比美國制裁隻安樂工程只跌得5%，但比《國安法》制裁隻壹傳媒竟然跌14.4%，唔撚通香港人就係咁唔爭氣，甘於比中共踩住心口上？
又咁啱響Check股價時，見倒響0.077個位有30萬股放緊，響神推鬼擁之下一嘢掃Q哂佢，反正都係兩萬幾蚊，輸尻哂就由佢──講就係咁講，其實背後都係計過蘋果帳面盤數都仲有得捱下，主要係搏中共唔會收佢皮，咁就算跌多四五成都只係蝕萬幾蚊左右，都係以前一個月買文具條數之嘛，我都仲蝕得起。
但計過還計過，買果陣真係100%無諗過282股價會倒升，真係傻嘅先會響果個時刻覺得買佢會有賺，點估倒一兩個鐘頭之間股價會升成三四倍咁痴線。
首先竟然有黃屍痴到話我同渾水掃壹傳媒係收Order做嘢，令壹傳媒被消失或收編，我地兩個就負責買起佢──幾萬蚊股票就可以買起間上市公司？喂就算點中二病都無可能諗倒呢一步丫大佬！
然後有連登仔話拎兩萬幾出黎買雞碎咁多壹傳媒就出黎「怨婦式擦存在感」，咁出個Post就點都有啲擦存在感嘅效果嘅，但我又唔撚明點樣「怨婦式」囉，同埋我又窮又孤寒，點似班連登仔個個月入十幾萬，有幾千萬身家，兩萬幾投資對我黎講好撚多錢架啦，如果真係用黎擦存在感，我諗我最多只捨得買1萬股……即係770蚊
至於有連登仔同財演走出黎屌尻話「買股票係幫唔倒黎智英，係要買報紙同網上訂閱先有用」
首先，公司股價高咗，作為大股東嘅黎智英想學王維基批股又好、直接賣股套現又好，點會幫唔倒手？
第二，訂蘋果同買報紙，同買蘋果股票兩樣嘢係毫無衝突bor，你鍾意買同訂蘋果產品咪去做囉，我只係覺得幫得太慢同金額太少，所以先走去買股票支持咋嘛，咁都要比你地屌？
然後到蘋果而家股價升咗幾倍，表達倒香港人就係會撐一間隨時會被拉人封艇嘅傳媒，就係表達咗不計成本全力支持新聞自由，引起埋國際注意，咁又算唔算係一次成功嘅國際線勝利呀？
當然算啦！因為又有連登仔出Post話「壹傳媒因連登支持而爆升，已經引起Financial Times記者留意」，之前屌尻人唔好買股票果啲即刻無聲出……我就真係無你咁好氣，學你班飯登仔話齋，我買兩萬幾蚊股票對個世界根本零影響，你地咁鍾意Claim功勞咪Claim哂佢囉，我只係鄧真正將件事炒起成為風潮嘅渾水覺得唔抵咋！所以點解我咁唔願意出名就係咁解……因為只係會比我帶黎無盡嘅煩惱，你地要威就威哂佢啦，唔好連我買兩萬蚊股票都要老屈我乜乜七七。
最後想講多一樣嘢，其實買壹傳媒股票果陣，仲有種焦土攬炒心態，就係覺得既然中共要黎智英收皮、蘋果執笠，我就偏要買佢啲股票等我跳埋上架沉船齊齊自殺式攬炒，吹牙，至於結局係點，反而唔係我當時會仔細考慮嘅嘢。
沒有留言:
發佈留言