感謝大家關心，「新疆嶺」單野已經上哂報初步引起到公眾廣泛關注。雖然平整土地舊錢俾佢偷雞拎左，但之後警察再去立法會拎錢起反恐基地主體工程個陣就冇咁容易，除非林鄭借反恐之名動用《緊急法》1秒拎撥款就另計。
到目前為止，政府發言人只係低調咁回應左一句話「有關傳聞，全屬失實」【註一】，又唔提供任何佐證話點解係謠傳，證明我地擊中左要害。好啦，你唔交代，咁就又輪到我地再提供更多斷正佐證既時間啦，Round 2。
--政府話「失實」既資料係由政府提供--
首先要指出既係，我地之前新屋嶺變「新疆嶺」篇文【註二】，成篇都係引述番你地官方文件既資料。個「特別行動訓練設施」，又係你自己交出黎個份立法會文件講，個警察設施用黎做「反恐」既「高級戰術培訓設施」，又係你自己講【註三】。
依家你話係「全屬失實」，咁係你想講自己捏造文書呃立法會定點?
-- 超級監獄變新疆嶺 --
平時讀多啲書，攪清楚來龍去脈先好答問題是很重要的。翻查過成個缸瓦甫既規劃史，花3分鐘時間了解左個度點樣由過往「超級監獄」走到今日既「新疆嶺」，就會更清楚當中個魔鬼細節喺邊：
● 01年封閉式超級監獄：董建華話香港監獄唔夠位，曾研究用200幾億選址喜靈州填海或者缸瓦埔平整成個山頭，起個裝15,000人既「超級監獄」【註四】；
● 03年後起唔成消失左：時任保安局既葉劉淑儀事後解釋番，話係深圳個邊唔鍾意咁近佢地有個「超級監獄」【註五】，民建聯就話基於保安問題【註六】，最後擱置左；
● 2010-12研究起樓：配合著港深邊境開發同搵地，搵左規劃顧問做個缸瓦甫工程可行性研究，研究中低密度住宅單位既可行性【註七】；
● 14 年變重置警察設施：個區轉變左個策略唔用黎起樓，話平整成個缸瓦甫19公頃，會用黎重置啲北區警察設施集中區，稱為騰空原本啲地出黎起樓【註八】；規劃署文件解釋，話係因為隔離新屋嶺既練靶場太嘈搬唔到所以唔適合住人【註九】…
● 16年7月交環評報告：透露成個19公頃綜合警察設施用地除左用黎重置北區警察設施之外，裡面重會額外起新既「警察訓練設施」【註十】，用途不明；
● 18年底去新疆學反恐：李家超話新疆反恐經驗「值得參考」【註十一】，同年初已成立「反恐專責組」，2013-17年間攪左大大小小333次反恐演習，單係17年攪左21次大規模反恐演習【註十二】；
● 19年2月上立法會：「警察訓練設施」個名稱，變左註明係用黎反恐 (anti-terrorist) 既新「特別行動訓練設施」 (new Specialist Operation Training Facility)，放入左新界東北成個335億撥款當中混水摸魚【註十三】；
● 19年5月過立法會：成功拎左新界東北財委會19億基建撥款，可以11月開展平整工程【註十四】。
簡單黎講，魔鬼細節既關鍵時間發生左喺2014年之後：先係話要集中化啲警察設施，2016年就偷偷地加新訓練設施上去，但做環評報告個陣又唔提係有反恐功能。連場反恐練兵又考察新疆之後，今年年初就插入個平程土地撥款入新界東北規劃順手拎錢，到個陣先輕輕交代左一句原來個警察設施係用黎反恐。
成件事政府點解要做到咁偷雞摸狗? 大家心照。
--成個都係反恐基地無誤--
政府話新疆嶺唔係反恐基地之後，我地好認真咁重新睇番最新份立法會文件，原文係咁寫：「缸瓦甫用地亦會設置一項新的特別行動訓練設施。這個新的警察設施，以及其他四個將被遷置的現有警察培訓設施，能在警察培訓方面產生協同效應。」【註十五】
攪清楚點解要設施重置同集中化既真正理由，就知反恐唔單只係成個新疆嶺其中一個功能，而係成個維園咁大既巨無霸基地，點解要集中哂所有靶場訓練場設施一齊，就係為左要同反恐用既「特別行動訓練設施」產生「協同效應」，可以令成個場100%都變左同步使用既反恐基地。
到時催淚煙、實彈、水炮車、瑩光粉、音波炮可以同日萬箭齊發，同場加埋城市模型演習爆屋生擒黃之鋒，當正佢係恐怖分子咁捉一次過，搵埋深圳武警聯合演習都夠哂大。如果訓練設施分散各處，就做唔到協同既效果。到時警暴又可以再進化到另一個層次。
--真心想問既問題--
1. 你話唔起新疆嶺反恐基地，咁係咪即係可以立即回水19億?
2. 你話我地失實，係咪即係承認你交去立法會既文件失實?
3. 2016年環評報告個陣冇提過話要攪反恐訓練，咁係咪應該取消佢平整工程既環境許可證中止工程，重新做過環評報告睇下有幾污染?
4. 你話唔起新疆嶺反恐基地，會唔會又用黎起番董建華個超級監獄?
唔好意思寫得太長，只係希望有證有據講到俾大家聽新疆嶺既真相，請大家繼續幫手傳出去，係阻止香港新疆化關鍵一步，成個基地既圖則都劃好哂等緊平整工程開工架啦。
參考資料：
【註一】新聞公報：政府澄清有關興建反恐警察基地謠傳 (2019年10月8日)
https://www.info.gov.hk/gia/general/201910/08/P2019100800516.htm
【註二】新屋嶺已停用 但隔離「新疆嶺」即將啟用!
https://www.facebook.com/localresearch/posts/2572229769539747
【註三】立法會PWSC150/18-19(01)號文件 (p.2)
https://www.legco.gov.hk/yr18-19/chinese/fc/pwsc/papers/pwsc20190318pwsc-150-1-c.pdf
【註四】立法會《監獄發展計劃》CB(2)1023/01-02(04)號文件
https://www.legco.gov.hk/yr00-01/chinese/panels/se/papers/se0207cb2-1023-4c.pdf
【註五】葉劉淑儀，《搬走監獄來建屋──可行嗎？》(2018 年4月3日)
http://reginaip.hk/regina/article/p/%E6%90%AC%E8%B5%B0%E7%9B%A3%E7%8D%84%E4%BE%86%E5%BB%BA%E5%B1%8B%E5%8F%AF%E8%A1%8C%E5%97%8E
【註六】立法會《民建聯對「監獄發展計劃」的反建議方案 民建聯對「監獄發展計劃」的反建議方案》CB(2)1769/00-01(01)號文件
https://www.legco.gov.hk/yr00-01/chinese/panels/se/papers/b1769c01.pdf
【註七】立法會會議過程正式紀錄 (2012年2月1日)
https://www.legco.gov.hk/yr11-12/chinese/counmtg/hansard/cm0201-translate-c.pdf
【註八】北區區議會討論文件《缸瓦甫用地的擬議發展》(2014年7月21日)
https://www.districtcouncils.gov.hk/north/doc/2012_2015/tc/committee_meetings_doc/dmweic/3771/n_dmweic_2014_035_ch.pdf
【註九】RNTPC Paper No.2/17 (p.3)
https://www.info.gov.hk/tpb/en/papers/RNTPC/576-rntpc_2-17.pdf
【註十】缸瓦甫警察設施工程研究– 可行性研究 環境影響評估報告
https://www.epd.gov.hk/eia/register/report/eiareport/eia_2392016/HTML/html/KNP%20ES_Chi.htm#_Toc457567249
【註十一】立法會《有關跨部門反恐專責組考察的聯署電郵》CB(2)728/18-19(01)號文件
https://www.legco.gov.hk/yr18-19/chinese/panels/se/papers/secb2-728-1-c.pdf
【註十二】立法會《公眾對恐怖襲擊的應變準備》ISE05/17-18
https://www.legco.gov.hk/research-publications/chinese/essentials-1718ise05-public-preparedness-for-terrorist-attacks.htm
【註十三】財務委員會 工務小組委員會討論文件PWSC (2 01 8 -1 9) 41 (2019年2月20日)
https://www.legco.gov.hk/yr18-19/chinese/fc/pwsc/papers/p18-41c.pdf
【註十四】明報：財委會通過新界東北發展逾335億元撥款(2019年5月3日)
https://news.mingpao.com/ins/%E6%B8%AF%E8%81%9E/article/20190503/s00001/1556879900114/%E8%B2%A1%E5%A7%94%E6%9C%83%E9%80%9A%E9%81%8E%E6%96%B0%E7%95%8C%E6%9D%B1%E5%8C%97%E7%99%BC%E5%B1%95%E9%80%BE335%E5%84%84%E5%85%83%E6%92%A5%E6%AC%BE
【註十五】財務委員會 工務小組委員會討論文件PWSC (2018 -19) 41 (2019年2月20日) (附件4第2頁)
https://www.legco.gov.hk/yr18-19/chinese/fc/pwsc/papers/p18-41c.pdf
--
📡 幫你睇實警暴惡法 大大力支持民間研究工作
https://liber-research.com/support-us/
🧟♂️ 新屋嶺已停用 但隔離「新疆嶺」即將啟用!
https://www.facebook.com/localresearch/posts/2572229769539747
🕵️♀️ 新設本研 Telegram Channel 立即追蹤!
https://t.me/liberinfo
https://m.facebook.com/story.php?story_fbid=2574223376007053&id=244689185627162
沒有留言:
發佈留言