新屋嶺已停用ㅤ但隔籬「新疆嶺」即將啟用！
本土研究社
2019/10/8
冇乜人留意，其實政府在反修例一開始嗰陣偷偷地拎咗 19 億撥款，喺新屋嶺隔籬平整一個比新屋嶺大成十幾倍嘅巨無霸超級警察設施專門針對反恐，呢個工程將會係香港新疆化既好重要一步！
起個「新疆嶺」？
依家政府會計劃在新屋嶺旁邊的缸瓦甫，平整一塊成 19 公頃高地，同維園一樣咁大嘅面積，講到明整一個綜合性反恐警察訓練設施集中區，即係類似新疆咁整個巨型反恐基地【註一】，打造個隔絕市區嘅「新疆嶺」。
「新疆嶺」裡面會有乜？現時公開資料極少，但如果根據環評時交代過的一份圖則【註二】，可以睇到有大量警車駕駛訓練場、試車場、大型練靶場、直昇機坪，還有沒有交代具體用法的「槍械設施訓練」、「多層訓練大廈」、「警察訓練設施」All in One，但究竟具體想攪啲乜暫時冇人知。
立法會議員區諾軒同陳志全曾經追問過【註三】，佢先交代多少少呢堆「特別行動訓練設施」嘅詳情，話係「一個專門用於反恐和其他專業行動的高級戰術培訓設施」，裡面會有模擬真實城市環境作訓練場，仍然係好唔具體。而所謂槍械設施訓練，就係搬咗附近啲練靶場整個綜合大靶場，可以進行手槍、來福槍、散彈槍等各種射擊訓練。另外會將依家放水炮車嘅粉嶺設施搬哂入去呢個反恐基地，即係未來啲水炮車、「聲波炮」銳武裝甲車嘅殺人武器，都可以荒山野嶺夜以繼日晚晚練都冇人知。
其實香港根本冇賓拉登，所以佢講所謂「反恐」嘅行動訓練，即係好明顯係用嚟針對一般市民遊行示威嘅公眾活動。
融合新屋嶺？
好奇怪地，政府整呢個「新疆嶺」嘅解釋，係話想重置附近嘅練靶場、練車場同訓練場。但在最新嘅「新疆嶺」計劃裡面，新屋嶺扣留中心同旁邊嘅新屋嶺靶場，又偏偏冇重置入去，在規劃發展圖則裡面會繼續存在。
所以要問嘅係，究竟林鄭在對話會聲稱新屋嶺「已停用」，意思係暫緩定撒回？如果唔係「永久停用」，就好可能就會融合旁邊「新疆嶺」扮演一個配合反恐基地既全新功能，當中設施又會唔會重新定位成好似新疆咁嘅「再教育營」，又或者係新界版嘅「關塔那摩監獄」，變成一個隔絕於世嘅法外之地？
新界變新疆？
話說 2018 年 12 月保安局長李家超去考察新疆反恐設施，就係去考察當地既反恐戰術訓練中心，番嚟香港之後仲話值得參考【註四】。話口未完，在 2019 年 1 月缸瓦甫個「新疆嶺」反恐基地基建工程就上立法會拎錢。
仲俾我地研究員摷得番早喺 2016 年 7 月【註五】，香港警察已經同新疆當局就著「突發同暴亂事件」進行過 4 日嘅深度交流同互相學習，特別在「緊急應變的戰術，從而提升監獄管理的質素」，好威威貼哂啲相上 Facebook。
究竟有冇將新疆經驗搬嚟新界？大家自己諗。
點解冇人知？
呢單工程冇咩人知唔係冇理由。因為政府識玩程序，將呢個平整工程項目硬塞咗入去新界東北個 335 億撥款，等傳媒聚焦咗入去村落清拆同地產霸權爭議，呢個「新疆嶺」警察反恐基地就會冇人理。
政府又識得將反恐基地嘅描述放咗落註腳嗰度，博你細字睇唔到，今年 5 月喺大家聚焦逃犯條例修訂嗰陣，就輕輕鬆鬆拎咗 19 億開始平整山頭，招標文件顯示 11 月工程商就會開工【註六】。
依家只係前期平整土地工程都要成 19 億，講緊呢種反恐規格嘅警政設施，預期造價成本過百億都唔出奇。而到目前為止，反恐基地設施造價係一啲具體預算都冇，諗著米已成炊之後嘅設施工程撥款就冇走雞。
反對「新疆嶺」
依家警察日日都在 18 區街頭搵市民練靶，十字路口玩漂移，乜類型啲射擊武器都訓練過啦，根本冇需要個咁嘅訓練基地。唯一係啲水炮車、聲波炮裝甲車呢類殺人武器，如果俾咗個山頭無人地帶佢可以瘋狂練習，佢嘅殺傷力就唔只係今日見到嘅級數，所以一定要反對呢個上百億借反恐之名用嚟襲擊市民嘅設施工程。
如果反恐基地根本冇需要又已經平整咗，最務實嘅辦法，就係將剛剛好又係 18 公頃嘅黃竹坑警察訓練學院成個搬入去，騰空番塊市區靚地做其他用地需要，仲量行估計可以起到 1.3 萬個住宅單位【註七】解決房屋問題，恐龍坑個區就留嚟做速龍坑，唔係根本唔應該俾佢施工。
其實，新疆淪落到出現集中營嘅田地，根據國務院最新嘅新疆白皮書【註八】，就係先有反恐警察基地，一步步反到近年就攪新疆集中營呢類「預防性反恐」，所以要預防香港去到「預防性反恐」呢一步，就係唔好俾政府借反恐之名逐步侵害。
如果要限制警暴橫行，就必須要反對呢個「新疆嶺」反恐基地工程，俾佢一個迎頭痛擊。如果林鄭唔係用《緊急法》拎錢整，咁預計將會在今個財政年度向立法會拎錢，唔該幫手廣傳呢個消息開去，做多啲嘢睇實呢個 site，阻止香港步向新疆化！
【註一】793CL－缸瓦甫警察設施土地平整及基礎建設工程 PWSC (2018-19)41 (附件4)
【註二】「缸瓦甫警察設施工程研究－可行性研究」環境影響評估報告 (2016年7月)
【註三】立法會 PWSC150/18-19(01) 號文件 (p.2)
【註四】李家超視察新疆：反恐值得參考 (2019年9月9日)
【註五】Facebook 專頁「支持香港警察」(2016年7月16日)
【註六】缸瓦甫警察設施土地平整及基礎建設工程 合約編號: ND/2018/01
【註七】明報財經，仲量聯行倡警校遷大灣區 釋地建屋，2018年7月11日
【註八】國新辦《新疆的反恐、去極端化鬥爭與人權保障》(2019年3月)
https://thestandnews.com/society/%E6%96%B0%E5%B1%8B%E5%B6%BA%E5%B7%B2%E5%81%9C%E7%94%A8%E1%85%A0%E4%BD%86%E9%9A%94%E7%B1%AC-%E6%96%B0%E7%96%86%E5%B6%BA-%E5%8D%B3%E5%B0%87%E5%95%9F%E7%94%A8/【註二】「缸瓦甫警察設施工程研究－可行性研究」環境影響評估報告 (2016年7月)
【註三】立法會 PWSC150/18-19(01) 號文件 (p.2)
【註四】李家超視察新疆：反恐值得參考 (2019年9月9日)
【註五】Facebook 專頁「支持香港警察」(2016年7月16日)
【註六】缸瓦甫警察設施土地平整及基礎建設工程 合約編號: ND/2018/01
【註七】明報財經，仲量聯行倡警校遷大灣區 釋地建屋，2018年7月11日
【註八】國新辦《新疆的反恐、去極端化鬥爭與人權保障》(2019年3月)
沒有留言:
發佈留言