（長文慎入😳）
兩日無出下旅遊相，係因為沖繩玩嘅途中遇到兩隻貓貓要救～😐
大前日我地睇完日櫻🌸嘅開車途中，喺名護區公路上見到間廢屋，好似見到有隻貓坐喺度。不遠處有個避車處，所以我地就停車行返去睇下...
去到果然見到隻白貓，點知仲見到隻黑色長毛貓，當時6點幾天色未黑晒，都仲可以睇到佢地嘅狀況。白貓狀況不錯，黑貓就好瘦好瘦，個身扁嘅。但兩個都異常親人，係咁叫叫叫，挨身挨勢🤦🏻♀️
Check下周圍環境同間廢屋🏚，都好肯定有人蓄意棄養，屋入面已人去樓空，屋外以前似係做攤檔生意，而周圍係乜都無，只有樹同公路😑
跟手我地就開車去最近嘅便利店買罐罐同乾糧，黑貓秒清2罐...
考慮過後，及問左Oki（一隻由香港人於沖繩旅遊期間帶返黎嘅貓貓）有咩診所介紹，同上網搵下當地嘅救助機構，希望可以救走佢地。當晚先去激安買飛機籠同布，買完再返去放低乾糧同水等等，因為就算救都無可能帶返酒店。
第二朝就去救佢地（每次都來回車程個半鐘，買野來回又1粒鐘，嗰兩日淨係開車來開車去😑），我地一開車門佢兩個已經飛奔過黎歡迎，再check多次附近真係乜都無🥺 兩隻貓貓我尋日已試抱上手，估計係可以救到入籠嘅。我地就嘗試放入籠，過程好順利，仲順攤過屋企班大帝😳
跟手就趕去大概1粒鐘車程嘅診所，去到上午期仲有20分鐘就閂門，而診所都好好無booking都照接，而因為分左日本人專區同外國人專區嘅關係（因為沖繩有美軍基地，所以好多外國人養寵物），溝通用英文都好順利✅。
因為日本機構收貓嘅基準間間不同，同醫生溝通完一輪後，最終驗FIV，Felv，寄生蟲，杜蟲杜蚤等先，可惜嘅係黑長毛貓有FIV，心肺功能上都疑似有問題，皮膚損晒，仲要有返咁上下年紀，我估有8歲或以上了，白貓就1-2歲健康好多，當下真係呆晒唔知點算。如果無機構收，唔通要原地放回？！😔佢咁嘅狀況亦唔會過到tests帶到返香港，拎佢去第二個地點放回就更加唔可以。
幸好，醫院肯破例收留一晚（當然要俾錢啦🙈），等我地多D時間去搵機構，而醫院都堅持我地要自己搵，無俾任何建議嘅機構。喺香港，我地係香港群貓會嘅義工，宗旨係No kill all cure💯，但日本，人生路不熟，又言語不通，實在好頭痛，怕搵到反而害左佢地。
我地搵呀搵，剛巧見到一間機構喺附近做緊領養日。去到又好好彩，佢地有位識講英文😍幾經溝通，佢地又打左無數個電話後，當下兩位義工會先分開暫托佢地，因為黑貓有FIV，兩個必須要分開，好可惜😔
佢地每星期都有領養日，如11月前都未搵到家，就會安排去東京照顧及尋家，因為當地被領養機會會較大。同我交換左聯絡後，約左第日於診所見一見醫生就接貓貓喇～～
期間我有諗搵多間啦不如，但當日星期日，日本大部分都唔開或只開到3點。而呢間問左殺唔殺嘅問題（好直接啊🙈），佢地好驚訝話一定唔會，收得就唔會殺。但佢地都提到有個沖繩機構係會殺嘅，類似香港嘅SXCA。
傍晚再返去探下兩個貓貓，白貓就比較驚唔食野，黑長毛貓就食晒野（佢好似前世未食過野咁），好嗲人。夜晚不斷睇機構嘅資料，但資料有限，盡做啦🤦🏻♀️ 幾經考慮後，都決定交俾佢地。
第日約左下午時間先接，我地早少少去探下佢地先。嗲到心都溶呀🥰白貓都唔驚喇，食晒野，適應力好強👍🏻 當地義工順利見完醫生就接左喇❤️之後都有同我keep contact，目前兩個習慣中。兩個要加油同叻D呀～～
成件事要不斷同自己講，一係唔救，救左就唔好諗咁多，逐步逐步做啦！最差諗過要留我或老公喺沖繩繼續搵，幸好一切都順利㊗️
我地繼續旅程喇，仲有2日返香港，好好玩埋先😆
今日大年初一，㊗️大家身體健康、萬事如意，貓貓狗狗🐱🐶們浪有所歸、有家嘅就繼續相親相愛嘆世界💓
Thank you Smile Paws Okinawa
Thank you Vets Park Hospital
Thank you 琉球皇Oki
Thank you 俾我煩過嘅朋友們
最Thank you係同我一齊癲嘅老公🤣
#沖繩 #Okinawa #沖繩貓 #黑貓白貓 #WhiteCatBlackCat #SmilePawsOkinawa #VetsPark #MissUTwo #Allthebest #Nokillallcure #香港群貓會
https://m.facebook.com/story.php?story_fbid=10157015737846350&id=725601349
沒有留言:
發佈留言