—————————
《係基督徒集會遇見一位前線勇武手足》中長文 慎入
「呢班真係人黎架咩？根本係天使黎」
點解會知佢係前線呢，其實係宜家尼個環境著得BlackBloc都基本上係架喇。
當時我地係公園橋頂，我想影大景既相，所以上左去。
到集會既尾聲，佢行左埋黎，企左係我隔離，因為臨完集會既10分鐘左右就有個遮右眼既默哀時間，咁我見佢包到咁實就問佢可唔可以比我影啦，佢又OK喎，咁緊係影啦，影完之後佢就問我：
影相做咩唔著反光衣？當保護自己先都好呀。
我就話比人周到仲麻煩啦。
咁寒暄左幾句其他野就開始左我地真正既對話～
真心，唔真係接觸過最前線手足，真係唔會明，講比大家聽下我同佢傾左既一啲內容，短短10分鐘左右，我地就傾到流哂馬尿。
介紹少少佢既背景。尼位前線勇武手足年紀同我差唔多大 佢原本已經係番緊工既人黎，但因為尼場反送中既政治運動加上經過612之後，佢就決定放棄工作，踏上尼條抗爭既路，而所有抗爭運動，佢係完全冇缺席過。
由於佢原本既工作同能力，佢最初係選擇上前線做急救員，做得急救員就緊係救人啦，佢有提及過，運動初期做急救員係好安全，冇咩急救員會受傷，但佢既工作係屬於最前線，見證得太多勇武手足既受傷同埋儲落對政府對警察既憤怒，令佢最後決定加入最前線既勇武派。
我嘗試覆述番我地既對話內容啦。
佢講述第一樣野係做得勇武派都一定有哂心理準備，食催淚彈好基本、替和理非捱棍擋子彈佢地都係預左，最前線好關鍵既地方就係點樣保護後面既人，嗰刻我聽到已經真係好震憾，因為我冇諗過會同到一個真係係前線既人講野，偉大到咁既，尼班真係人黎架咩？根本係天使黎。我都有同番佢講我好明白前線人員做緊既野，我絕對唔覺得拆圍攔、搬水碼係暴力，尼個係策略，加上佢地已經付出左好多，所以我從來冇質疑過同譴責過前線既決定同行為，都希望其他人可以諒解佢地。淨係講岩岩元朗靜坐嗰日，收到風話有防暴速龍攻上去清場，一班勇武就即刻出哂黎起路障，比後面既和理非有足夠時間走。你話唔感動就假啦。
第二，由急救員變成勇武其實唔容易，見證到咁多前線倒下既手足都仲要踏出尼一步，決心係要好大。手足都講過係番唔到轉頭，唔係講佢變左勇武之後就唔救人，能力既野冇人帶得走，佢指番唔到轉頭係佢只會更加撲出去救傷者，因為佢會走得更前。要幾咁大愛先可以為人去諗到咁既地步，仲要唔理自己既狀態去行事。講真呀，就算比錢你去做呀，正常人都唔會做到咁。尼度我已經眼濕濕。
第三，佢講番係8月5全民罷工日佢係黎左大埔，當然都係企到最前，基於多個星期既政治運動既操練，佢講過前線人員進化得好快，佢亦都係一個會幫手指揮既人黎，如果當時係大馬路既人絕對會聽過佢用大聲公指揮既聲音。
第四，佢係識得被爆眼既女仔，因為同為急救員，所以點都合作過。見證住你識既人受重傷係幾咁難受幾咁覺得無力既事。爆眼既一刻，佢講述佢都係現場，大致上佢描述既現場環境同其他訪問都差不多，佢都講話現場本來就好安全，真係得記者同急救員，而佢一諗住行開食支煙既時候，就有幾下既槍聲，而嗰位女仔就不幸中槍喇。講到尼個位，手足都開始忍唔住，講野已經係哽咽咁樣講，最後都係流左眼淚出黎。我想講既係，我地尼啲坐係冷氣房睇到唔同片段都會好無力好冇心機，但大家有冇諗過，一班係最前線既勇武派係會比我地更無力，因為佢地係睇住眼前既手足被捕、比人用私刑、受重傷、侮辱等等，尼啲係發生係佢地眼前呀，佢地既無力感係同我地係有天淵之別，試問我地仲有咩資格批評前線既佢地呢？
最後尼位手足都講左樣好有意思既說話。佢話我地面對既敵人係政府同中共，係真正既高牆。我地尼啲普通市民可以做到既唔多，因為我地冇權力。不過大家都堅持左兩個月，每日都衝擊少少，會唔會可以令高牆出現一道少少既裂痕呢？佢又話當我地真係去發聲去抗議既時候，受到既打壓愈黎愈強就證明我地做緊既野係有效架。
講到尼度，尼位手足就話要搵番自己嗰team，大家拍拍對方既膊頭講句小心、加油，然後尼位前線勇武手足就消失左係我眼前，感覺尼啲先係真正既無名英雄。佢地唔介意人唔明白佢地、唔介意會唔會有人多謝佢地為其他人擋子彈擋棍，只係默默咁為自己所愛既香港付出。以我既理解，遮樣唔係因為做錯事，而係唔想領功，當然最大既原因係信唔過宜家尼個咁腐敗既政權同低劣既政治打壓，搞到一見到警察就要搵路走搵地方避。可能大家會覺得係個人選擇，但的確冇尼班手足，反送中條例已經通過左喇。我開頭唔明白點解係不割席、不篤灰、不分化，但今日我明白喇。
總之，香港人加油，堅持到底。
仲有，前線勇武手足們，多謝你地！
如果想分享出去既話 隨便啦
為免大家再擔心會怕認到佢 唔怕話比大家知 我P左圖架喇 放心🙏🏻
https://m.facebook.com/photo.php?fbid=10220186919130263&id=1445257043&set=p.10220186919130263
沒有留言:
發佈留言