=====
#手傳動 from 網友
頭先我同幾個朋友係一間餐廳食飯，隔黎枱有位女士，大約廿幾三十歲，一個人坐左係度食野，我地一直都無為意佢，自己係度傾下計，屌下啲黑警咁。但係呢個女人埋單準備走既時候，佢突然間坐左埋黎，話聽到我地頭先屌差佬，有啲野想同我地講。
我開頭以為佢係藍絲或者警員親屬想幫差佬平反，點知佢話佢原來915既時候同屋企人俾黑警兇過。之後佢就用左十分鐘左右同我地講佢既經歷。其實坦白講，個故事係依家咁既時勢中算係小事，新聞亦都一定唔會報，但佢同我地分享既過程當中，我同朋友都完全感覺到佢猶有餘悸果種感覺。
今次我開呢個post打個故事出黎，唔係話要爆多個咩核彈從而幫個運動起到咩關鍵性作用，而係我覺得呢個故事好貼地，好真實，係大部分和理非既香港人都有機會遇到，而又冇咁傳媒采訪既一啲小型警暴行為，係呢到再分享出黎，目的同果位女士一樣，係希望到時有人唔好彩遇到防暴時有定心理準備要點處理。
以下係果位女士既分享：
我住灣仔，果晚我同我老公同細佬落屋企樓下食飯，我老公行先，我同我細佬係後面，點知就正正係樓下（只係同屋企大廈距離十米左右）撞到班仆街防暴。當時我地全部著街坊裝無戴口罩，但防暴一見到我地就好撚惡，係咁講粗口問我地做乜撚野係度出現，我地話落街食飯，之後佢地又係咁講粗口，然後好大力咁推左我老公埋牆，好彩我老公夠大隻冇咩事，但我當時見到當然上前理論，點知佢地不停好大力咁用盾去撞我，撞到我手指好痛同埋連手機都爆埋（編按：當時佢拎左部手機俾我睇，係半個mon爆左，個home制都爛埋，可想而知有幾大力），之後我同我細佬都俾佢地撞左埋牆。
撞左埋牆之後，我地同不停同佢地解釋，又問佢地做咩推我地埋牆，我地真係落街食飯。我當時全身得銀包鎖匙又唔係著黑衫，我show埋俾班防暴睇我咩都冇帶想同佢地解釋。點知班防暴好似痴撚左線咁，不停講「屌你老母講撚完未」，到之後我地三個都冇再出聲，佢地都不停屌我地話我地「屌你老母講撚完未」，「講乜撚野」，係咁咆哮，係真心好似一班野獸，完全聽唔明人話咁。之後佢講講下，竟然無啦啦拎催淚水劑出黎，指住我地，係好近好近，我望住就係我眼前幾吋既催淚水劑，佢未開我已經驚同委屈到流眼淚。然後我醒起直望催淚水劑係好on9，先慢慢耷低個頭。我地幾個一路都冇出聲，好彩佢地都冇射到啲催淚水劑。
後尾，佢地勁大聲屌我地問我地拎身份証，我老公好快就伸左隻手出黎拎左身份証俾佢地睇，點知佢地又唔拎，不停繼續問我地拎身份証，係完全精神分裂咁。之後我老公講左句「你地想點，又要問，俾你你又唔睇」。之後就賴野了，俾佢「串」親果個防暴就拎左伸縮警棍出黎，想衝埋去扑佢，我當時心入面諗左好多野，我地會俾人打成點呢？我係咪會入新屋嶺俾人強姦呢？好彩好彩附近有傳媒（SCMP）跑埋黎。而衝埋黎作勢想打我老公個頭果個防暴一見到有傳媒就順勢打落去幅牆到。然後有個係隔黎一直企係度既便衣就走埋黎扮曬野問咩事，重新再問過一啲佢之前已經聽到果啲野，例如係度做咩，住邊等等，估計都係係鏡頭面前扮野。後尾問多兩句就放走左我地了。
完
分享呢個故事其實有兩個重心想講：
一，我現場聽我都聽到眼濕濕，好多時我地做冷氣軍師，和理非，雖然深知道班黑警係痴撚線，但親身經歷同隔住個mon睇係完全兩回事。正如呢一件咁小既事，呢一位女士九日之後仍然有好大好大既心理陰影。所以我地要再次多謝所有前線同義士，因為佢地經歷同付出既其實比我地想像既要多好多。希望日後會多啲體諒同支援，少啲指責。
二，以上係一個好真實好貼地既故事，係任何一個香港人冇心理準備下都有機會遇到既野，希望大家有定個底俾防暴圍既時候係點，唔好有不設實際既幻想。冇傳媒又敵眾我寡既時候，唯有委曲求全，如果唔係除左令自己同身邊既人受苦之外咩都達唔到。當然，自身人多勢眾就唔同講法，可以完全唔洗怯。
P.S. 呢位女士係拉小提琴既，佢話佢受左傷既手指到而家都未好返，而家拉琴都好難拉。
最後有野想同呢位女士講：唔好意思我當時唔記得同你講，我見你好似好想俾更多人知道你既故事，其實我有位記者朋友（國際權威報紙）一路有寫香港示威，有時會採訪下呢啲真人真事既故仔，你有興趣就加我telegram (@hdldns)，我俾佢聯絡辦法你。
天佑香港
https://m.facebook.com/groups/1094495067293073?view=permalink&id=2462016663874233
2 則留言:
汝聽euderus set 寄生蜂否？
北京大興機場開幕，
汝感海星可愛之處？
注 海星可2種繁殖。
有性無性，各有千秋。
汝之惠聰，不用多言。
唯有性 自參考
《海星的變態生涯》
多謝資料,硏究下先。
發佈留言